سيبوهم يتعلموا !!

قابلت شخصية مصرية من كفر الزيات - طنطا له اراء متلخبطة زي لخبطة الحالة العامة للبلد .. اولا هو امي مبيعرفش يقرا ولا يكتب ، اراؤه في  بعض السياسيين مختلفة تماما عن بعض فمثلا بيحب مرسي جدا عشان " كفاية انه بيصلي "  ومبيستحملش حد ينتقد مرسي وعنده ردات فعل غريبة لو حد انتقد مرسي في التليفزيون  بيتحول لتبادل الشتائم مع اللي في التليفزيون وكان مؤمن ان شفيق هو اللي هيوقف البلد على رجليها عشان "فاهم" وكان نفسه اللي يكسب في انتخابات الرئاسة يبقى ابو الفتوح ودعاية صباحي والبرادعي هما اللي خربوا البلد وخرموا الاوزون واصله عنده .. تحليلي للخبطة ده من كلامه انه بيكره الثورة او توابعها من مظاهرات واعتصامات وقطع طرق واضرابات وده من كلامه " الله يلعن اللي عملونا التحرير " و " الله يخرب بيت الثورة واللي جلنا من وراها " فكان عايز شفيق الجزء التاني انه اختار اتنين اسلاميين وده معناه انه مهم عنده الايدلوجيا والفكرة الاسلامية عامة يعني من النهاية هو كان عايز رئيس اسلامي محدش يتكلم قدامه ولا حتى من وراه .. الكلام في السياسة عنده وبالذات برامج التوك شو كلام فاضي وان فيلم لهنيدي احسن من ده كله بس له رؤية في القنوات المتابعة للشأن السياسي محلي او دولي .. اون تي في قناة كدابة - البي بي سي قناه محايدة وبتجيب اراء الكل - بيميل ناحية العربية اكتر من الجزيرة عشان يتابع الاخبار .. بالنسبة للدستور فمكنش شايف انه له فايدة وكان شايف اللجنة عاملة زي لجنة موافقة بتاعة فتحي سرور وانه ملهمش لازمه .. انا كاتب الموضوع مش عشان احلل رؤية حد بس عشان ايام الانتخابات البرلمانية وفي التجارب اللي بيحكم فيها الصندوق والمواطن البسيط الامي مبيبقاش نسبة قليلة فيها فعددهم 28% بكلام قنديل -رئيس الوزراء- يعني ما يقارب ال30 مليون مواطن فبعض الناس طلعت تقول ان المفروض المؤهل عشان يبقى له حق التصويت .. الناس ده هتتعلم سياسة لما سعر لتر السولار في حكومة ب160 قرش في حكومة تانية تبقى اقل من كده لما يلاقي تأمين لولاده ولابوه وامه وانهي ناس وانهي حزب هتشتغل على الكلام ده .. لما يلاقي الحد الادنى بيكفيه وبيسد التضخم اللي حاصل .. الناس ده بتتعلم سياسة حتى لو متابعتها ليها قليلة لانهم بيتعلموها اكتر في الشارع .. الناس ده بتتعلم سياسة زي الدكاترة والنشطاء وزي الحكومة وزي المعارضة وزي المحللين السياسيين واساتذة العلوم السياسية وخاصة اخر اتنين اللي في قضية خروج المشير طنطاوي وعنان من المشهد كان كلامهم وتحليلهم قبلها حاجة وبقى بعدها حاجة تانية وده دليل على انهم برضوا بيتعلموا .. الفترة ممكن تبقى طويله عشان نتعلم كلنا بس محدش بيتعلم بالساهل واتمنى من الجميع يدي الفرصة للجميع يتعلم ويفهم

خيبتك يابلدي ان هيبتك في خيبتك

الدولة تستعيد هيبتها عقب عامين من الانفلات ده العنوان الرئيسي للاهرام يوم الاحد .. الدولة بقى استردت هيبتها من مين ؟!! .. الاجابة يا سادة ان الدولة استردت هيبتها من البياعين اللي في الشارع -الباعة الجائلين- هي ايه الدولة ده اللي هيبتها تبقى معناها انها تحط راسها براس البياعين .. وبعدين الهيبة اللي بصحيح واللي نفهمها هي على الكبير والصغير ، انك تحط على الكبير قبل الصغير .. الهيبة تبقى على المشير وعم احمد اللي بيبيع عالطريق .. هيبة الدولة يعني هيبة قانون بيطبق على الكل .. هيبة الدولة مش انك تحبس باعة جائلين زي مابتحبس بياعين الدعارة .. هيبة الدولة معدتش تنفع تبقى برضوا من هيبة رمز الرئيس وده عكس رئيس تحرير الاهرام عبد الناصر سلامة اللي بيقول ان القضية الاساسية هي استعادة هيبة الدولة وهيبتها في رمزين رمز وزير الداخلية وهو بيلم اللي في الشوارع بيبيعوا والثانية هي تغيير الخطاب الاعلامي تجاه الرئيس يعني بالبلدي يتلموا احسن مانلمهم زي البياعين .. خيبتك يابلد ان هيبتك في خيبتك

 

مقال عبد الناصر سلامة المشار اليه (الرمز وهيبة الدولة)